Snjallsíminn
Snjallsímanotkun
12 leiðir til að draga úr snjallsímanotkun
- Leggja símann frá sér á ákveðinn stað þegar heim er komið
- Sleppa símanum í rúminu, við matarborðið og í fjölskyldu- og vinahóp
- Eiga úr og vekjaraklukku
- Matmálstímar án snjallsíma
- Slökkva á öllum tilkynningum
- Engin óþarfa öpp
- Beina athygli að þeim sem við erum að tala við
- Stilla símann á flugham
- Búa til símafrían stað á heimilinu
- Gera einn dag vikunnar að snjallsímalausum degi eða hluta úr degi
- Sleppa síma í ræktinni og þegar þú ætlar að slaka á
- Minnka birtustig og stilltu á síu fyrir blátt ljós ef hægt er
Til eru ýmis öpp sem geta hjálpað þér að átta þig á hvað þú ert að eyða miklum tíma í símanum. Hér er slóð sem þú getur kíkt á: Best Apps To Track & Limit Social Media Usage On iPhone & Android (2021).
Síminn kallar á athygli!
Bara það að vita af símanum í sama herbergi hefur áhrif samkvæmt rannsókn Adrian F. Ward og félaga. Því meira sem við notum símann og erum háð honum því sterkari eru áhrifin.
Síminn er svo mikilvægur lykill að upplýsingum, gögnum, tengslum og skemmtun að hann hefur algera sérstöðu í lífi flestra. Þó slökkt sé á honum niðri í tösku úti í horni virðist hann kalla á okkur – án þess að við gerum okkur grein fyrir því. Þetta er umhugsunarvert fyrir þá sem hafa símann við höndina allan sólarhringinn.
Ný snjallsímaforrit frá Google
Unlock Clock er eitt af nýju forritunum. Það er í raun veggfóður á símann sem telur hversu oft þú aflæsir honum yfir daginn. Talningin hjálpar til við að sjá hve oft við tékkum á símanum og reiðum okkur á hann. Hægt er því að setja sér mælanlegt markmið um að fækka skiptum sem við opnum símann.
Það má líta á We Flip sem félagslega tilraun fyrir hópa og fjölskyldur. Allir í hópnum þurfa að hafa forritið á símanum og ræsa á sama tíma. Það mælir svo hversu lengi hópurinn getur verið án símanna. Þegar sá fyrsti gefst upp endar lotan og hægt er að sjá hve lengi haldið var út.
Post Box aðstoðar við að minnka áreiti vegna truflandi skilaboða og tilkynninga. Það stöðvar boðin, safnar þeim saman í flokka og skilar á þeim tímum sem þú velur, allt að fjórum sinnum á dag. Kannski er nóg að skoða boðin einu sinni á dag?
Morph býður upp á að sníða notkun símans eftir staðsetningu eða tíma dags. Þú getur t.d. sett upp vinnuham og ham sem hentar heima. Þú færð aðeins tilkynningar frá þeim ham sem þú ert stillt/ur á, t. d. færðu ekki tilkynningu um vinnupóst þegar þú ert heima og ekki tilkynningar frá Snapchat í vinnunni (ef þú stillir appið þannig). Morph og svipuð forrit geta hjálpað til við að setja skýrari mörk milli vinnu og einkalífs ef þau eru sett upp og notuð á markvissan hátt.
Desert Island. Þarna velurðu sjö (eða færri) mikilvægustu öppin og þú sérð engin önnur á skjánum, en getur nálgast hin á auðveldan hátt. Eftir sólarhring færðu yfirlit yfir hvernig þér gekk að halda þig við þau sem þú valdir og hve oft þú opnaðir önnur forrit. Eins og nafnið gefur til kynna er ætlunin að aðstoða fólk við að einfalda símanotkunina og forgangsraða. Með tímanum gætirðu fækkað forritunum enn frekar.
Paper Phone er óvenjulegt app sem gefur möguleika á að taka hlé frá símanum yfir daginn en hafa jafnframt tiltækar upplýsingar sem þú þarft úr honum á útprentuðu blaði sem brotið er í tvennt (þrisvar sinnum). Forritið er enn á tilraunastigi en það á að geta prentað út dagatal, leiðarlýsingu, veðurspá, verkefni, tengiliði og fleira sem þú velur að hafa við höndina yfir daginn. Hægt er að vista upplýsingarnar sem pdf-skjal ef fólk vill síður prenta út.
Á öðrum stað hér á síðunni höfum við rætt um að hægt er að velja grátóna stillingu á símann sem gerir hann minna aðlaðandi og við getum sótt forrit til að fylgjast með hve löngum tíma við verjum á einstaka síðum. Við getum einnig læst öppum eða sett tímamörk á notkun þeirra (sjá t.d. hér). Með þessum forritum og öðrum álíka fáum við verkfæri til að nýta tæknina á einfaldari hátt sem gæti hjálpað okkur að ná stjórninni aftur.