Fara í efni

Þjónusta VIRK

Hlutverk VIRK er að efla starfsgetu einstaklinga með heilsubrest sem stefna að aukinni þátttöku á vinnumarkaði. VIRK byggir starfsemi sína á þekkingu, rannsóknum og reynslu til að tryggja samþætta, árangursríka og örugga þjónustu. Jafnframt sinnir VIRK forvörnum, þróunarverkefnum og fræðslu með það að markmiði að auka þátttöku einstaklinga á vinnumarkaði. -Nánar um VIRK.

Hér á Velvirk í starfi - Leiðtogar er samantekið efni frá VIRK sem stjórnendur geta nálgast á einfaldan hátt til að nýta á sínum vinnustað. Efnið er hugsað til að styðja við stjórnendur og starfsfólk til að auka vellíðan og koma í veg fyrir og/eða draga úr veikindafjarveru.

Starfsendurhæfing VIRK

Tilgangur með þjónustu VIRK er að aðstoða fólk við að komast til vinnu. Um er að ræða markvissa einstaklingsmiðaða ráðgjöf og þjónustu á sviði starfsendurhæfingar sem krefst fullrar þátttöku viðkomandi einstaklings.

Skilyrð fyrir starfsendurhæfingu

Einstaklingur sem óskar eftir þjónustu VIRK þarf að byrja á að panta tíma hjá lækni og ræða við hann hvort starfsendurhæfing hjá VIRK sé raunhæfur kostur. Meginskilyrðin fyrir starfsendurhæfingu eru:

  • Að viðkomandi geti ekki sinnt starfi sínu að hluta eða öllu leyti eða tekið þátt á vinnumarkaði vegna hindrana af völdum heilsubrests sem rekja má til veikinda eða slysa. Um er að ræða fjarvistir frá vinnu í lengri tíma vegna heilsubrests af andlegum eða líkamlegum toga.
  • Að markmið einstaklings sé að verða aftur virkur þátttakandi á vinnumarkaði, eða auka þátttöku á vinnumarkaði, svo fljótt sem verða má.
  • Að geta og vilji sé til staðar til að taka markvissan þátt í starfsendurhæfingunni og fylgja þeirri áætlun sem þar er sett fram.

Sjá nánar um rétt til þjónustu hjá VIRK.

Starfsendurhæfing samhliða vinnu

Starfsendurhæfingu er hægt að sækja hjá VIRK samhliða vinnu. Einstaklingur fær þá tækifæri til að minnka við sig vinnu og byggja sig upp á sama tíma. Það getur virkað vel með starfsendurhæfingu að sinna áhugaverðum verkefnum í vinnunni, halda rútínu og sambandi við vinnufélaga. Vinnan sjálf getur þannig oft verið eitt besta úrræðið í starfsendurhæfingunni. Kynntu þér Starfsendurhæfingu samhliða vinnu á vef VIRK.

VIRK Atvinnutenging

VIRK Atvinnutenging er samstarf VIRK við fyrirtæki og stofnanir í tengslum við ráðningar starfsfólks.

Markmiðið er að ljúka starfsendurhæfingu á farsælan hátt með því að útvega einstaklingum störf við hæfi og fyrirtækjum gott starfsfólk ásamt því að halda uppi virkri atvinnuþátttöku á Íslandi og stuðla að heilbrigðu samfélagi. Nánari upplýsingar finnur þú á VIRK Atvinnutengingu og í þessu stutta kynningarmyndbandi.

Fyrirtæki geta líka smellt á tengilinn hér til að skrá sig til samstarfs, leita eftir starfskrafti eða senda inn fyrirspurn. Einnig er hægt að ná sambandi við atvinnulífstengla í netfanginu atvinnutenging @virk.is.

 

Sjálfshjálparefni

Hjá VIRK höfum við tekið saman efni sem stjórnendur geta nýtt með sínu starfsfólki til að auka vellíðan í vinnu. Um er að ræða einfalt og aðgengilegt sjálfshjálparefni fyrir stjórnendurna sjálfa og efni sem þeir geta notað með starfsfólki vinnustaðar eða bent því á. Tilgangurinn með framsetningu efnisins er að styðja við stjórnendur og starfandi einstaklinga enda aðstæður mismunandi á ólíkum vinnustöðum.

Vefsíðan Velvirk.is

Velvirk er vefsíða sem forvarnarsvið VIRK heldur úti. Markmiðið með forvarnarsviðinu er að styðja við starfsmenn og stjórnendur til að sporna við brotthvarfi af vinnumarkaði vegna heilsubrests. Við lifum í samfélagi þar sem vísbendingar eru um að sífellt fleiri heltist úr lestinni vegna tímabundinna eða langvarandi veikinda. Svo virðist sem hluti af þessum veikindum sé til kominn vegna langvarandi álags bæði í starfi og einkalífi. Velvirk.is er ætlað að halda utan um upplýsingar og gagnleg ráð í forvarnarskyni.

Eru fyrirsjáanlegar breytingar á vinnumarkaði?

Í þeim hröðu breytingum sem nú eru í samfélaginu okkar getur fólk búist við að standa frammi fyrir því nokkru sinnum á starfsferlinum að hasla sér völl á nýjum starfsvettvangi. Sem stjórnandi gætir þú viljað nýta efnið á Aftur í vinnu til að styrkja starfsfólkið þitt ef óvissutímar eru framundan eða uppsagnir. Aftur í vinnu spannar allan feril atvinnuleitar frá því einstaklingurinn byrjar að hugsa um að breyta til yfir í fyrstu vikurnar í nýju starfi.

Hefur þú hugað að starfsþróun?

Gagnvirka sjálfshjálparefnið Hver ert þú? gætir þú viljað nota með stafsfólkinu þínu til að styrkja það í starfi og auka sjálfstraust þess á vinnustaðnum. Starfsmaður sem er vel meðvitaður um styrkleika sína og færni og hefur tekið meðvitaðar ákvarðanir fyrir sig er líklegur til að skila góðu starfi og halda tryggð við vinnustaðinn. Á Hver ert þú? getur starfsmaðurinn skoðað viðhorf sín til vinnu og starfa, styrkleika sína, færni og ýmis hagnýt atriði sem skipta hann máli. Hann getur skrifað niður starfsreynslu sína, menntun og framtíðardrauma sem hafa áhrif á starfsval hans og einnig getur hann fundið út hvaða störf honum finnast áhugaverðust. Að lokum sér hann á einum stað allt það sem skiptir hann mestu máli með tilliti til starfa. Frekari skýringar fyrir þig og starfsmanninn í þessu kynningarmyndbandi.

Verkfærakista

Í Verkfærakistuna á Velvirk.is söfnum við „tækjum og tólum" fyrir vinnustaði sem hægt er að nota til að skapa jafnvægi og vellíðan í starfi. Þar finnur þú meðal annars verkfæri tengd mannauðsmálum, streituvörnum, veikindafjarveru, áreiti og heilsueflandi vinnustöðum.