Að vinna heima

• Ánægðara starfsfólk og veruleg aukning í afköstum. Starfsfólkið er við vinnu allan vinnutímann og einbeiting mun meiri en í áreitinu á vinnustað.
• Verulega dregur úr starfsmannaveltu. Hægt að spara tíma í ráðningum og þjálfun nýs starfsfólks.
• Fjárhagslegur ávinningur er töluverður. Ávinningur er vegna aukinna afkasta, minni starfsmannaveltu og lægri kostnaðar vegna húsnæðis.

Auk þessa þekkjum við ávinning samfélagsins þegar færra fólk er á ferðinni, bæði hvað varðar mengun og skipulag. Þetta ásamt ýmsu öðru áhugaverðu um fjarvinnu og tvinnvinnu má lesa um á vef Apollo Technical.

Í nýrri Buffer könnun frá árinu 2022 kemur fram að 97% starfsfólks myndi vilja vinna áfram í fjarvinnu og mæla með henni. Þá sögðust 90% hafa jákvæða reynslu af fjarvinnu. Helstu kostina við fjarvinnu segir starfsfólk vera sveigjanleika í hvernig tíma þeirra er varið og sveigjanleika í hvar þeir vinna. Einnig að það hafa meiri tíma þegar ekki þurfi að ferðast til vinnu og svo að geta valið eigin búsetu. Þá sé fjárhagslegur ávinningur af fjarvinnu og auðveldara að einbeita sér að verkefnunum. Helstu ókostirnir séu hins vegar að ná að slíta sig frá vinnunni í dagslok og svo einmanaleikinn, en hvoru tveggja gætu að vísu líka verið fylgifiskar covid tímans.

• Hafa fastan vinnutíma. Best er að byrja á föstum tíma á morgnana, setja upp vinnuáætlun og halda sig við hana. Sveigjanleiki er einn af kostunum við heimavinnu en mikilvægt að byggja á venjum og góðu skipulagi.
• Hefja störf og ljúka á sama tíma. Setja sig í vinnustellingar frá upphafi vinnudags og ekki sinna öðru svo vinna þurfi fram á kvöld. Forðast að láta starfið flæða inn í frítímann.
• Viðhafa morgunrútínu. Fara í háttinn á skynsamlegum tíma, vakna á sama tíma, sinna hefðbundnum morgunverkum, klæða sig í vinnufötin og láta venjur leiða sig inn í starfið.
• Setja skýr mörk fyrir aðra á heimilinu. Koma því til skila að ekki sé hægt að sinna erindum eða verða fyrir truflun á vinnutíma, loka sig af eins og hægt er.
• Taka pásur og passa upp á líkamsstöðu. Það er mikilvægt að taka pásur til að hvílast eða standa upp, liðka sig og hreyfa, jafnvel fara út.
• Útbúa góða vinnuaðstöðu. Hafa umhverfið snyrtilegt, huggulegt og án áreitis. Stilla vel af borð, stól og skjái.
• Takmarka tíma á frétta- og samfélagsmiðlum á vinnutíma. Það skilar sér í betri einbeitingu og meiri afköstum.
• Vera í sambandi við yfirmann og samstarfsfólk helst daglega. Þekkja þarf verkefni dagsins og ekki hika við að biðja um aðstoð, aðföng eða úrræði. Samstarf og spjall er mjög mikilvægt (helst í mynd) til að koma í veg fyrir einangrun.
• Ekki nota pásur í heimilisstörf. Stilla sig inn á að vera alveg í vinnunni á vinnutíma, mörkin renna til í huganum þegar þessu er blandað saman.
• Mikilvægt að minna á sig. Mæta á fundi og taka þátt. Hafa samband og láta vita af sér, upplýsa um viðveru, þegar verkefnum er skilað eða farið er í orlof.
• Sýna jákvæðni. Vanda skrifleg samskipti því þegar líkamstjáningin fylgir ekki með er aukin hætta á mistúlkun. Nota broskalla og önnur jákvæð tákn.
• Kúpla sig alveg út þegar vinnudegi lýkur og gera eitthvað allt annað. Þá má skella í vél, fara í ræktina eða út að viðra sig.