Náttúrukort

Útivist bætir hressir og kætir

Á Íslandi erum við svo lánsöm að búa í nálægð við náttúruna sama hvar við erum. Góður göngutúr leiðir okkur niður að sjó eða vatni, mólendi eða skógum. Á göngunni getum við andað að okkur fersku loftinu og notið þess sem fyrir augu ber.

Svo virðist sem hugarfarsbreyting sé að eiga sér stað í heiminum og við séum að átta okkur á þeim styrk sem við getum sótt í umhverfi okkar og náttúru. Læknar á Hjaltlandseyjum hafa verið að bjóða sjúklingum upp á náttúrudagatal með hugmyndum að hreyfingu og náttúrupplifun sem meðferðarúrræði og kollegar þeirra í Kanada ávísa á heimsóknir í listasöfn. Japönsk skógarböð hafa einnig fengið aukna athygli en talsmenn þeirra benda á lækningarmátt skóglendis og hvetja til skógarferða til að bæta heilsu og líðan.

Í ljósi alls þessa viljum við því bjóða ykkur upp á 10 hugmyndir fyrir hvern mánuð ársins sem þið getið notað til að styrkja heilsuna og halda góðu jafnvægi.

Njótið náttúrunnar í samræmi við eigin getu – Njótið vel!

Ágúst

Skella þér í útilegu.
Velta þér í grasinu á miðri göngu. Hvílast, horfa upp í himininn og hlusta á tónverkið sem vindurinn spilar á grasið.
Leita að sveppum og taka myndir. Getur þú fundið 10 tegundir?
Leita að skordýrum og safna nokkrum tegundum.
Fleyta greinum og blöðum niður á.
Ganga um blómagarða og skoða plöntuúrvalið – t.d. Grasagarðinn í Reykjavík eða Lystigarðinn á Akureyri.
Fylgjast með öndum eða álftum með ungana sína í heilar 10 mínútur.
Finna köngulóarvef og skoða uppbyggingu hans. Fylgjast með og rannsaka. Hver á hann og hvað veiðist í hann?
Líta eftir fífum á göngu dagsins. Hér á árum áður voru fífuhausarnir tættir í sundur og snúnir saman í kveik. En getur þú búið til smá vefnað úr fífunum?
Rölta um í fjörunni og skoða sjávargróður.