Náttúrukort

Útivist bætir hressir og kætir

Á Íslandi erum við svo lánsöm að búa í nálægð við náttúruna sama hvar við erum. Góður göngutúr leiðir okkur niður að sjó eða vatni, mólendi eða skógum. Á göngunni getum við andað að okkur fersku loftinu og notið þess sem fyrir augu ber.

Svo virðist sem hugarfarsbreyting sé að eiga sér stað í heiminum og við séum að átta okkur á þeim styrk sem við getum sótt í umhverfi okkar og náttúru. Læknar á Hjaltlandseyjum hafa verið að bjóða sjúklingum upp á náttúrudagatal með hugmyndum að hreyfingu og náttúrupplifun sem meðferðarúrræði og kollegar þeirra í Kanada ávísa á heimsóknir í listasöfn. Japönsk skógarböð hafa einnig fengið aukna athygli en talsmenn þeirra benda á lækningarmátt skóglendis og hvetja til skógarferða til að bæta heilsu og líðan.

Í ljósi alls þessa viljum við því bjóða ykkur upp á 10 hugmyndir fyrir hvern mánuð ársins sem þið getið notað til að styrkja heilsuna og halda góðu jafnvægi.

Njótið náttúrunnar í samræmi við eigin getu – Njótið vel!

Maí

Ganga meðfram á eða vatni og hlusta á fugla í tilhugalífinu eða horfa eftir fiskum stökkva.
Leita uppi fífla undir vegg og finna ilminn. Það gæti verið gaman að lista upp hvaða plöntur eru farnar að blómstra.
Kanna hvort krían er komin og finna jafnvel kríuvarp.
Grafa andlitið í nýsprottið grasið.
Hafa augun opin og kíkja eftir hreiðrum. Hvar eru hreiður í þínu umhverfi? Eru þau í trjánum í garðinum, út í móa, niður í mýri eða út við sjó?
Fara í kvöld- eða næturgöngu í bjartri sumarnóttinni – horfa og hlusta.
Hlusta eftir hrossagauknum og reyna að koma auga á hann. Gömul þjóðtrú segir að hann spái fyrir um sumarið, eftir því úr hvaða átt fólk heyrir hann fyrst hneggja á vorin.
Finna öruggan stað úti í náttúrunni til að koma þér fyrir í fullkominni ró í a.m.k. 3 mínútur og veita því athygli hvernig þér líður.
Ganga að fuglabjargi og fylgjast með bjargfuglum – dást að svifi þeirra.
Fylgjast með trjánum bruma. Það getur verið gaman að þekkja tegundirnar og skoða hvaða tré bruma fyrst.